MAGPAPATULOY ang malamig na umaga at gabi sa Metro Manila at sa iba pang panig ng bansa, ayon sa weather bureau. Nangingibabaw ang northeast monsoon o hanging amihan sa buong bansa, dagdag pa ni Jomaila Garrido ng Philippine Atmospheric, Geophysical and Astronomical Services Administration (Pagasa). Ang Cagayan Valley, Cordillera Administrative Region, Caraga, Davao Region at lalawigan ng Aurora at Quezon ay magkakaroon ng maulap na papawirin at kaunting pag-ulan. Katamtamang lagay ng panahon ang mamamayani sa Metro Manila.